Azərbaycan Respublikasının Konstitusiya Məhkəməsinin Plenumu 18 fevral 2026-cı il tarixində Əmək Məcəlləsinin 144-cü maddəsinin bəzi müddəalarının Konstitusiyaya uyğunluğu ilə bağlı mühüm qərar qəbul edib.
Əvvəlki hüquqi tənzimləməyə əsasən, əmək stajına və işin xüsusiyyətlərinə görə verilən əlavə məzuniyyətlər, eləcə də müəyyən kateqoriyadan olan işçilərə (məsələn, uşaqlı qadınlar və azad edilmiş ərazilərdə çalışan mütəxəssislər) təqdim edilən əlavə məzuniyyət günləri əmək müqaviləsinə xitam verilərkən kompensasiya olunmurdu.
Konstitusiya Məhkəməsi isə fərqli mövqe ortaya qoydu. Məhkəmə bildirdi ki, əlavə məzuniyyət hüququ işçinin əmək şəraiti və sosial vəziyyəti nəzərə alınaraq verilir və bu hüququn maliyyə qarşılığının ödənilməməsi bərabərlik prinsipinə ziddir.
Bu əsasla, müvafiq norma Konstitusiyaya uyğun hesab edilmədi və onun tətbiqi dayandırıldı.
Yeni hüquqi yanaşmaya görə, artıq əmək müqaviləsinə xitam verilərkən işəgötürən istifadə edilməmiş bütün məzuniyyət günlərinə – həm əsas, həm də əlavə məzuniyyətlərə görə – işçiyə kompensasiya ödəməlidir.
Qeyd edək ki, bu qərar əvvəl başa çatmış əmək münasibətlərinə şamil edilmir. O, yalnız qərar qüvvəyə mindikdən sonra yaranan hüquq münasibətlərinə və hazırda məhkəmələrdə baxılan işlərə tətbiq olunur.
